النهاردة يوم مختلف إن شاء الله ..
الجو صحو وجميل .. والعصافير تزغرد بالخارج .. والحجاج بيكبروا فى مكة .. وحبيب حيتجوز النهاردة ..!
ايوا الواد محمد حبيب انضرب فى نافوخه بالحب والجواز (عقبالنا يااااااااارب) ..
ومحمد حبيب لمن لا يعلم ..
إنسان عادي يعني زي باقيت الانانيس اللى هم البني ادمين .. مصمم ويب وربنا كرمه ولزق فى لينك دوت نت ..
سامع واحد خفيف دلوقتي بيقول تلاقيه قاعد نت ببلاش .. اقوله لا ياشاطر .. حبيب عنده اتصالات انترنت .. سخافة سخافة  ..
المهم حبيب بقى عنده 22 سنة .. وناشط اجتماعي .. وكان يوماً ما ناشطاً سياسياً وعرف ان السياسة مش بتأكل عيش فقرر انه ينفضلها وينضم لصفوف المتفرجين ..
قوم ايه بقى الواد حبيب حب وطب وكركر انه يتجوز
ونقوله يبني اعقل ؟
يقول يمين بعظيم ابداً .. حتجوز يعني حتجوز ..
الخلاصه كتب كتابه من كام شهر كدا فى الأزهر ورحنا وباركنا .. ورحت كاجوال والحياه زي الفل وكل اللى كانوا هناك كانوا لابسين بدل ..
بس ولا همني ..
كل اللى همني اسمعه وهو بيقول لوالدها زوجني ابنتك ..
كان هاين عليا اعيط .. والله عشت وشوفتك بتتجوز ياحبيب
واحد من الأربعة الكبار اتجوز .. لا ومين .. الراس الكبيرة فى الكبار كمان .. حبييييييييب ..
والنهاردة فرحه ياجدعان .. توت توت توت ..
حالة من النشاط الزائد بقالنا تلت اسابيع انا والعيال عشان خاطر فرح حبيب النهاردة ..
بدل جديدة بقى وحركات ..
واللى زاد وغطى بقى .. انه حكم علينا كلنا حكم شايب .. اننا نحضر الفرح بكرافات مووف ؟؟ مووووووف ؟ موووف ياحبيب .. الهي وانت جاهي يا شيخ .. تقع منك جرافتتك يابعيد ..
كرافات موف ازاي يعني ؟
مش كفاية ان الفرح فى القاهرة ؟!
ومش كفاية انه عمله day wedding الساعه 3 ونص العصر ..
ومش كفاية انه شقلب الدنيا خالص ..
كمان كرافات موف ؟
حاجتين اتنين بس اللى حيغفرولك ياحبيب ..
الاكل يكون كويس .. ويكون فى رقاصة فى الفرح ..
غير كدا .. يمين بعظيم ابداً ..
لازم تتربى على الموف ..

أما عن أخبار الرياضة ..
حبيب جاب جووووون ياجدعان ..
حبيب ماشي ماشي ماشي .. وهوبا جووون ..
حيتجوز النهاردة ..
مبرووك يا حبيب ..
—————–

يارب اكتبلهم السعادة والهنا العمر كله..
وارزقهم الزرية الصالحة اللى تطلع عنيهم بحب وهنا .. واصرف ياحبيب عشان تعلم العيال ..
ويشوف ابنه عريس كبير كدا يارب ويطلع ظابط .. ماهو كل العيال بيطلعوا ظبابيط ..
وكمان الواد يوم فرحه يقوله الكرافاتات لونها حنكشي كدا .. ويعمل فرحه morning wedding ..
ماهي العيلة الحبيبية دي مش حتنتهي ..
صباح الظليطة ..
كان معكم من خلف الكيبورد .. محمد رضوان فى زي النوم الرسمي ..
سلام عليكم ..